बारा / प्रदेश नम्बर २ मा
प्रमुख जिल्ला अधिकारी (सिडिओ)को नक्कली सहि गरेर सवारी पास बनाउने दुई युवकलाई
प्रहरीले पक्राउ गरेको छ । पक्राउ पर्नेमा बारा जिल्लाको सदरमुकाम कलैया
उपमहानगरपालिका वडा नम्बर १७ निवासी २१ वर्षीय जयनारायण प्रसाद जयवाल र वडा नम्बर
३ निवासी ३० वर्षीय गोपाल प्रसाद कलवार रहेका छन् ।
जयसवाललाई जिल्ला
प्रशासन कार्यालय बाराको किर्ते छाप र दस्तखत भएको सवारी पास प्रयोग गरेर
सवारीसाधन चलाईरहेको अवस्थामा पक्राउ गरेपछि उनले दिएको बयानको आरोपमा कलवारलाई
पनि पक्राउ गरिएको प्रहरीले जानकारी दिएको छ ।
बारा प्रहरीका प्रवक्ता
एवम् प्रहरी नायव उपरीक्षक (डिएसपी) गौतम मिश्रका अनुसार गत असार २६ गते शनिबारका
दिन जितपुरसिमरा उपमहानगरपालिका वडा नम्बर १ पथलैया चोकमा प्रहरीले गर्ने नियमित
सवारीसाधनको चेकजाँचका क्रममा कलैयादेखि काठमाडौँ जाँदै गरेको ना १ ज ७२८८ नम्बरको
सुमो गाडीलाई रोकेर चेकजाँच गर्दा गाडीधनि समेत रहेका चालक जयनारायण प्रसाद
जयसवालले जिल्ला प्रशासन कार्यालय बाराको छाप र अधिकृतको दस्तखतसमेत किर्ते गरी
बनाइएको नक्कली सवारी पास प्रयोग गरेर सवारी चलाइरहेको पाइएको थियो ।
जयसवाललाई पक्राउ गरेर
सोधपुछ गर्दा उनले कलैया उपमहानगरपालिका वडा नम्बर ४ स्थित मालपोत कार्यालय अगाडी
गोपाल प्रसाद कलवार सञ्चालक रहेको दाईभाई फोटो स्टुडियो एण्ड जनरल स्टोरबाट पास
बनाएको बयान दिएका थिए । उनले दिएको बयानको आधारमा प्रहरीले स्टोरमा छापामारी गरेर
खानतलासी गर्दा त्यहाँबाट थप ३ थान नक्कली सवारी पास र पास बनाउन प्रयोग गरिएका २
थान प्रिन्टर र १ थान कम्प्युटर लगायतका उपकरणहरु बरामद गरिएको प्रहरीले जानकारी
दिएको छ ।
पक्राउ परेका दुवैलाई
इलाका प्रहरी कार्यालय सिमरामा राखी लिखत सम्बन्धी कसुर (किर्ते मुद्दा) का आधारमा
थप अनुसन्धान गरिरहेको ईलाका प्रहरी कार्यालय सिमराका प्रमुख प्रहरी नायब उपरीक्षक
मनोजित कुँवरले जानकारी दिए ।
