मनाङ / बाढी पहिराको जोखिममा जीवनयापन गर्न बाध्य हिमाली
जिल्ला मनाङमा उज्यालो छाएको छ । गण्डकी प्रदेश सरकारको सहयोगमा मनाङका १६ वटा
सरकारी कार्यालयमा सोलार प्यानल, इन्भर्टर र ब्याट्री
जडान कार्य भइरहेको छ ।
विद्युत् नहुँदा अस्पतालमा उपचार सेवा र सरकारी
काम प्रभावित भएकाले खरिद गरी पठाइएको सोलार जडान कार्य भइरहेको प्रमुख जिल्ला
अधिकारी विष्णु लामिछानेले जानकारी दिनुभयो । उनका अनुसार जिल्लाका
प्रशासन कार्यालय, स्वास्थ्य कार्यालय, प्रहरी कार्यालयलगायतका सरकारी कार्यालयमा सोलार
जडान भइरहेको छ ।
पीडामा परेको जिल्लामा
हरेक विषयको अद्यावधिक हुनका लागि पनि सोलार जडान गरी सेवा र सूचना प्रवाहलाई
प्रभावकारी बनाउन सोलार, इन्भर्टर र ब्याट्री
पठाइएको मुख्यमन्त्री कृष्णचन्द्र नेपाली पोखरेलले बताएका छन् । प्रदेशको ऊर्जा, जलस्रोत
तथा खानेपानी मन्त्रालयले छरितो प्रक्रियामार्फत सामान खरिद गरी पठाएको हो ।
करिब १९ लाख रुपैयाँको सामान खरिद गरेर
हेलिकोप्टरमार्फत चामे पठाइएको थियो । सामान
ढुवानीका लागि लागेको चार लाख ३१ हजार रुपैयाँ गण्डकी सरकारले नै
बेहोरेको छ । सार्वजनिक खरिद ऐनको दफा ४१(१) (घ) बमोजिम विशेष परिस्थितिमा
सार्वजनिक खरिद प्रक्रिया अपनाई सामग्री पठाइएको मुख्यमन्त्री पोखरेलले बताएका छन् ।
सामान खरिद गरेर लमजुङ
सदरमुकाम बेँसीशहरमा पुर्याइएको र शुक्रबार मनाङको सदरमुकाम चामे पुर्याई शनिबार जडान भइरहेको ऊर्जा, जलस्रोत तथा खानेपानी मन्त्रालयका सचिव रामचन्द्र
श्रेष्ठले बताएका छन् । बाढीपहिराका कारण स्थानीयस्तरका लघु जलविद्युत्
योजनामा क्षति पुगेकाले मनसुन शुरु भएसँगै मनाङ अन्धकारमा रहेको छ ।
विभिन्न स्थानका
राष्ट्रिय प्रसारण लाइनमा जोडिएको पोल ढलेका कारण सदरमुकाम चामेसहित अन्य गाउँमा
बिजुली बल्न सकेको छैन । असार मसान्तमा सम्पादन गर्ने काममा समेत बिजुली नभएकै
कारण प्रभावित भएको अवस्थामा गण्डकी सरकारले सोलार सहयोग गरेर सहजता कायम गराएको
प्रजिअ लामिछानेले बताएका
छन् ।
