काठमाडौँ / देशभरी कोरोना भाइरसको महामारी फैलिएर सामाजिक दूरी कायम गर्न र स्वास्थ्य मापदण्ड अपनाउन सरकारले आग्रह गरिरहेका बेला भक्तपुर भने जुवा तासको अखडा बनेको छ ।
प्रहरीले यहाँका विभिन्न नगरपालिका क्षेत्रमा जुवातासका अखडा बनाएर जुवा खेलिरहेको अवस्थामा धमाधम पक्राउ गर्न थालेको हो ।
शनिबार साँझ भक्तपुरबाट प्रहरीले तास खेलिरहेका २७ जनालाई पक्राउ गरेको छ । प्रहरीले मध्यपुरथिमि नगरपालिका –७ नगदेश र सूर्यविनायक नगरपालिका– ५ कटुन्जेबाट २७ जनालाई पक्राउ गरेको हो ।
नगदेशका रत्नकाजी अवालेको रत्न खाजा घरमा तास खेलिरहेको अवस्थामा रत्नकाजीलगायत ११ व्यक्तिलाई प्रहरीले दुई लाख ६४ हजार १०० रुपैयाँ सहित पक्राउ गरेको बताइएको छ ।
सूर्यविनायकको कटुन्जेको गणेश हिलका बासिन्दा ३२ वर्षीय कर्म तामाङको हाम्रो खाजा घरबाट पनि १६ व्यक्तिलाई एक लाख २१ हजार ६०० रुपैयाँ सहित पक्राउ गरिएको प्रहरी उपरीक्षक दीपक गिरीले बताए ।
चाँगुनारायण नगरपालिका –२ दुवाकोटको फोक्सिङटारमा डेरा गरी बस्ने दोलखा मेलुङ गाउँपालिका –६ का ४१ वर्षीय दिपेश भण्डारीको कोठाबाट पनि चार दिनअघि प्रहरीले ११ व्यक्तिलाई तास खेलिरहेका बेला पक्राउ गरेको र उनीहरुका साथबाट २४ हजार २४० रुपैयाँ बरामद गरेको छ ।
सूर्यविनायक–७ घ्याम्पेडाँडामा सञ्जीव वाग्लेले सञ्चालन गरेको घ्याम्पे आइएनएन होटलमा तास खेल्ने छ व्यक्तिलाई प्रहरीले पक्राउ गरेको छ । जुवातास खेलिरहेका बेला महानगरीय प्रहरीवृत्त जगातिको टोलीले वाग्लेसहित उनीहरूलाई पक्राउ गर्नाका साथै रु ५८ हजार २०० बरामद गरेको छ ।
भक्तपुरमा नयाँ प्रहरी प्रमुख आएको एक साता नबित्दै जुवा तास खेल्ने व्यक्ति पक्राउ पर्न थालेका हुन् । नयाँ प्रहरी प्रमुख आउँदा जुवा खेल्ने तथा खेलाउने मान्छे पक्राउ परे पनि पछि भने पक्राउ नपर्ने भएकाले प्रहरीको मिलेमतो हुने गरेको थिमिका बासिन्दा राजाराम श्रेष्ठको आरोप छ ।
