काठमाडौँ / राष्ट्रिय युवा परिषद्को आयोजनामा ‘विज्ञान, प्रविधि, नवप्रवत्र्तन र उद्यमशीलतामा
युवा राष्ट्रिय सम्मेलन’ आजदेखि
यहाँ शुरु भएको छ । युवालाई
अध्ययन अनुसन्धान, नवप्रवत्र्तन
र उद्यमशीलतासँग जोड्न सम्मेलन आयोजना गरिएको हो ।
परिषद्का कार्यकारी उपाध्यक्ष माधवप्रसाद ढुङ्गेलले विज्ञान
र प्रविधि क्षेत्रमा भएका अनुसन्धानलाई युवाको उद्यमशीलतासँग जोड्न सम्मेलन आयोजना
गरिएको जानकारी दिएका छन् । उनले सम्मेलनबाट प्राप्त सुझावले सरकारलाई विज्ञान र
प्रविधिको नीति निर्माणमा सहयोग पुर्याउने बताएका छन् । उनले सूचना प्रविधि र विज्ञानका विद्यार्थीलाई
अनुसन्धानमूलक बनाउन कार्यक्रम आयोजना गरिएको सुनाउनुभयो । उपाध्यक्ष ढुङ्गेलले
युवाको प्रतिभालाई प्रस्फुटन गराउन सातै प्रदेशमा नवप्रवत्र्तन केन्द्र स्थापना
गरिनेसमेत जानकारी दिएका छन् ।
शिक्षा, विज्ञान तथा प्रविधि मन्त्रालयका सचिव
रामप्रसाद थपलियाले विद्यालय तहमा विज्ञान र प्रविधि विषयमा विद्यार्थीलाई आकर्षित
गर्ने कार्यक्रम सञ्चालन गर्ने तयारी भइरहेको बताएका छन् । उनले सम्मेलनले विज्ञान र प्रविधि शिक्षामा सहयोग पुर्याउने जनाउँदै विज्ञान र प्रविधिलाई समाजसँग
घुलमिल गराउनुपर्ने बताएका छन् ।
त्रिभुवन
विश्वविद्यालयका उपकुलपति प्रा.डा.धर्मकान्त बाँस्तोलाले अनुसन्धान र
नवप्रवत्र्तनमा नेपालको शिक्षा कमजोर रहेको विश्वास गर्दै सरकारले उच्च शिक्षामा
बजेट बढाउनुपर्नेमा जोड दिएका छन् । उच्च शिक्षामा अनुसन्धान र नवप्रवत्र्तनका काम
हुनसके युवालाई स्वरोजगारमुखी बनाउन सकिने जनाउँदै उनले सम्मेलनले युवालाई
नवउद्यमीको सिर्जना गर्न अवसर प्राप्त गर्ने बताएका छन् ।
नेपाल विज्ञान
तथा प्रज्ञा–प्रतिष्ठानका
उपकुलपति डा सुनिलबाबु श्रेष्ठले विज्ञान र प्रविधिलाई समाजको समस्या समाधान गर्ने
माध्यम बन्ने विश्वास व्यक्त गरेका छन् । उनले विज्ञान र प्रविधिमार्फत युवा जनशक्तिलाई
परिचालन गरे मुलुकले समृद्धि हासिल गर्नसक्ने बताएका छन् । विज्ञान र प्रविधि क्षेत्रमा लगानी गरे प्रतिफल प्राप्त गर्न
सकिने जनाउँदै उनले विज्ञान र प्रविधि क्षेत्रमा काम गर्ने
संस्थाबीच अन्तरसम्बन्ध गराउनुपर्नेमा जोड दिएका छन् ।
काठमाडौँ
विश्वविद्यालयका उपकुलपति डा भोला थापाले विज्ञानबाट सिकेका कुरालाई
उद्यमशीलतातर्फ लैजानुपर्ने बताएका छन्। उनले युवाले आफूसँग भएको सीपलाई उत्पादनशीलतामा परिणत
गर्नु आवश्यक रहेकामा जोड दिएका छन् । सम्मेलनमा स्नातकोत्तर तह अध्ययन गरिरहेका विद्यार्थीलाई युवा
वैज्ञानिकले अनुसन्धान गरेका विषयमा जानकारी गराइने परिषद्का प्रमुख प्रशासकीय
अधिकृत डा.बाबुराम ढुङ्गानाले बताएका छन्।
सम्मेलनमा
विज्ञान, प्रविधि, शिक्षा, स्वास्थ्यलगायत चार विषयमा अनुसन्धानकर्ताले कार्यपत्र प्रस्तुत
गर्नेछन् । सोमबारसम्म सञ्चालन हुने सम्मेलनमा करीव ४०० युवा वैज्ञानिकको सहभागिता
छ ।
