गाईघाट / उदयपुरको बेलका नगरपालिका-३ स्थित कोशी जनता माध्यमिक विद्यालय कक्षा १० मा अध्ययनरत छात्रा कविता सुनुवारको हत्यामा संलग्न रहेको आरोपमा २ जना पक्राउ परेका छन् । पक्राउ पर्नेमा सरिता ढकाल खत्री र १९ वर्षीय राजेन्द्र ढकाल रहेको प्रहरीले जनाएको छ । ट्युसन पढ्न हिँडेकी कविता मंगलबार बिहान यशोदा खोला नजिकै मृत अवस्थामा फेला परेकी थिइन् ।
साथी सरितासँग केही दिनअघि भएको सामान्य विवादका कारण दुईजना मिलेर ढुङ्गाले हिर्काएर उनको हत्या गरेको प्रहरीको प्रारम्भिक अनुसन्धानबाट खुलेको छ । उनको शव विद्यालय पुग्नुभन्दा करिब ७ सय मिटर वरपर भेटिएको र घटनाबारे थप अनुसन्धान भइरहेको जिल्ला प्रहरी कार्यालय उदयपुरका एसपी सुवास बोहराले जानकारी दिए ।
