विराटनगर / विराटनगरमा रहेको एकीकृत भन्सार जाँचचौकी आईसीपीमा थप पूर्वाधार निर्माण कार्य सुरु गरिएको छ ।
नेपाल इन्टरमोडेल यातायात विकास समितिले आईसीपीमा सञ्चालित भन्सारको कामलाई सहज बनाउन जाँचचौकी परिसरमा १५ करोड रुपियाँ लागतमा नयाँ संरचना निर्माण थालेको हो ।
भन्सारमा जाँचपास घर, पार्किङ स्थल, गोदाम घर सहितका संरचना निर्माणको काम थालिएको समितिका इन्जिनियर शुभकान्त राउतले जानकारी दिएका छन ।मालवाहक सवारी पार्किङ अभाव हुँदा आईसीपी परिसरको सडकमै पार्किङ गर्नुपर्ने स्थिति छ ।
इन्जिनियर राउतका अनुसार आवश्यकताका आधारमा आठ हजार वर्गमिटरको ब्लक पार्किङ स्थल, ११ हजार वर्गमिटरको अस्थायी पार्किङ स्थल, जाँचपास घर र गोदामघर निर्माणको काम भइरहेको छ । गोदामका लागि १२ करोड र जाँचपास र अस्थायी पार्किङ स्थलका लागि तीन करोड रुपियाँ लागत रहेको छ ।
२०७६ साल माघ २ गते यो आईसीपीको उद्घाटन भएको थियो । आवश्यक संरचना अभाव हुँदा समस्या पर्दै आएको भन्सार प्रमुख ताराप्रसाद सापकोटाले बताए । उनले आईसीपी क्षेत्रमा पाँच प्रकारका जाँचपास घर आवश्यक हुने बताए । त्यसमध्ये भारतमा हुने निकासी – पैठारी स्थानीय, तेस्रो मुलुकबाट हुने पैठारी – निकासी, कार्गो रेलबाट आयात हुने सामान जाँचपास र जफत गरिएका सामानको जाँचपास गर्ने घरको जरुरी रहेको उनले बताएका छन । अहिले आईसीपी क्षेत्रमा दुईवटा मात्रै जाँचपास घर रहेका छन् ।
उनले आईसीपी क्षेत्रमा ल्याब नहुँदा सबैभन्दा धेरै समस्या भइरहेको बताउँदै आगामी वर्ष ल्याब स्थापनालाई प्राथमिकतामा राखिने जानकारी दिए । त्यसैगरी भन्सार क्षेत्रमै पेट्रोल पम्प राख्ने योजनासमेत रहेको सापकोटाले बताए । उनले प्रशस्त जग्गा भए पनि संरचना अभावमा न्यून उपयोग भएको बताए ।
इन्टरमोडलले १२९ बिघा क्षेत्रफलमा रहेको आईसीपी सञ्चालनका लागि ट्रान्स नेपालसँग सम्झौता गरेको छ । पाँच वर्षे सम्झौताअनुसार ट्रान्स नेपालले ३५ करोड रुपियाँमा ठेक्का लिएको निर्देशक लक्ष्मी सुब्बाले जानकारी दिए ।ट्रान्स नेपालले समेत आईसीपी क्षेत्रमा संरचना अभाव हुँदा व्यापार सहजिकरणमा समस्या भइरहेको गुनासो गर्दै आएको छ ।
