झापा
/ कोरोना संक्रमण बढेसँगै झापाका कोभिड अस्पतालहरू सङ्क्रमितले भरिन थालेका छन् ।
मेची प्रादेशिक अस्पताल भद्रपुरमा ७५ शैयाको क्षमता रहेको कोभिड उपचार केन्द्रमा ६० वटा शैयामा मात्र अक्सिजनको सुविधा उपलब्ध छ । हाल अस्पतालमा ६० जना सङ्क्रमितको उपचार भइरहेको र अक्सिजन आवश्यक पर्ने बिरामीलाई अन्य अस्पतालमा पठाउन थालिएको अस्पतालका मेडिकल सुपरिन्टेन्डेन्ट डा टङ्क बारकोटीले जानकारी दिएका छन् । पाँचवटा आइसीयु कक्षमध्ये तीनवटा कोभिडका बिरामीको उपचारका लागि छुट्याइएकोमा सबै शैया भरिएको उनले जानकारी दिएका छन् ।
बिर्तामोडको बीएन्डसी अस्पतालमा पनि १००
शैया कोभिड सङ्क्रमितको उपचारका लागि छुट्याएकोमा
७४ जना बिरामीको उपचार भइरहेको अस्पतालका जनसम्पर्क अधिकृत प्रमिश गिरीले जानकारी दिएका छन् । अस्पतालले
३२ शैयाको आइसीयु संक्रमितका
लागि व्यवस्था गरेकामा हाल
सबै शैया भरिएको उनले बताएका छन् ।
बिर्तामोडस्थित पूर्णटुङ्ग बिर्तासिटी अस्पतालमा कोभिडका लागि ५३ शय्याको आइसोलेशन, नौ शय्याको भेन्टिेलेटर र १२ शय्याको आइसीयु व्यवस्था गरिएको भएपनि हाल सबै आइसोलेसन वार्ड, आइसीयु र भेन्टिलेटर भरिएको अस्पतालका प्रशासन प्रमुख विनोद बस्नेतले जानकारी दिएका छन् । व्यवस्था गरिएको सबै शैयामा सङ्क्रमितले भरिएपछि अब आउने नयाँ बिरामीलाई पाल टाँगेर राख्न पर्ने अवस्था आउन सक्ने उनले बताएका छन् ।
त्यसैगरी , दमक नगरपालिकाले सञ्चालन गरेको बेलडाँगी कोभिड अस्पतालमा ३० शैया व्यवस्था गरिएकोमा पूर्णरुपमा संक्रमितले भरिएको अस्पतालले जानकारी दिएको छ ।
