म्याग्दी / जिल्लाको बेनी नगरपालिका-३ भकिम्लीमा
रहेको स्वास्थ्यचौकीमा छाता ओढ्नुपर्ने भएको छ। स्वास्थ्यचौकीको भवन जीर्ण भएर
पानी चुहिन थालेपछि बर्खायाममा पानी पर्दा स्वास्थ्यकर्मी र सेवाग्राही छाता ओढेर
बस्ने गरेका हुन् ।
स्वास्थ्यचौकीका
प्रमुख जनस्वास्थ्य निरीक्षक धीरजकुमार शाहले भवनको प्रसूति कक्षभित्र पानी पर्दा
छाता ओढेर सेवा दिने गरेको बताएका छन् । भवनको अभावमा करिब एक हजार घरधुरीले सेवा
लिने स्वास्थ्यचौकीको कामकाज प्रभावित बनेको हो ।
जीर्ण, साँघुरो र पानी चुहिने कच्ची भवनमा
स्वास्थ्य संस्था सञ्चालन गर्दा नागरिकलाई समस्या भएको छ । स्वास्थ्यचौकी सञ्चालन भएको नमूना आमा
समूहको भवन मर्मत अभावमा जीर्ण बनेको हो । एक कोठामा प्रशासन र औषधि भण्डारण कक्ष
बनाइएको छ । बहिरङ्ग, सोधपुछ र प्रसूति कक्ष एउटै कोठामा सञ्चालन भएको छ ।
गोप्य कक्ष
नहुँदा सेवाग्राहीले लाज मानेर आफ्ना समस्या खुलेर स्वास्थ्यकर्मीलाई बताउन
सक्दैनन् । दैनिक १० जनाको हाराहारीमा सेवाग्राही आउने गर्छन् । स्वास्थ्यचौकीको
भवन बनाउन जग्गा प्राप्त भए पनि बजेट अभावमा कार्यान्वयन हुनसकेको छैन ।
स्वास्थ्यचौकी
व्यवस्थापन समितिका अध्यक्ष समेत रहेका वडाध्यक्ष पदम पुनले भवन बनाउन नगरपालिका मार्फत
प्रदेश र सङ्घीय सरकारमा प्रस्ताव गरिएको बताएका छन् । स्थानीयवासी पृथीलाल खत्रीको परिवारले आठ
रोपनी जग्गा निःशुल्क उपलब्ध गराएको छ। यसअघि तीन रोपनी जग्गा उपलब्ध गराएको
खत्री परिवारले नयाँ मापदण्डपछि थप पाँच रोपनी उपलब्ध गराएको हो ।
नगरपालिकाका
उपप्रमुख सञ्जु बरुवालले विस्तृत परियोजना प्रतिवेदन तयार पारेर साझेदारीमा
स्वास्थ्यचौकी भवन बनाउन प्रदेश र सङ्घ सरकारका निकायमा प्रस्ताव गरिने बताएका छन्
।
