सोलुखुम्बु / नेपाल पत्रकार महासङ्घ सोलुखुम्बु शाखाले ‘पत्रकार आपत्कालीन राहतकोष’ स्थापना गर्ने भएको छ । आइतबार बसेको महासङ्घको बैठकले उक्त कोष स्थापना गर्ने निर्णय गरेको शाखा अध्यक्ष नूतन श्रेष्ठले जानकारी दिएका छन् ।
उनका अनुसार विभिन्न समस्यामा परेका पत्रकारलाई सहयोग गर्ने उद्देश्यले स्थापना हुने राहतकोष सञ्चालनका लागि निर्माण गरिएको कार्यविधिसमेत सोही बैठकले अनुमोदन गरेको छ । पत्रकार महासङ्घको साधारण सदस्य रहेकालाई उक्त कार्यविधिले समेट्ने बताइएको छ ।
पत्रकार महासङ्घको सदस्य भई कुनै पनि सञ्चारगृहमा काम गर्ने सिलसिलामा दुर्घटनामा परी गम्भीर घाइते भई अस्पताल लैजानुपरेको अवस्थामा सहयोग गर्नसकिने कार्यविधिमा उल्लेख छ । यस्तै अङ्गभङ्ग भएमा वा जटिल किसिमको रोगको उपचार गर्नु परेमा, दुर्घटनाका कारण मृत्यु भएमा, पत्रकारको परिवार बिरामी भएमा र कुनै आगलागी तथा प्राकृतिक प्रकोपमा परेको अवस्थामा पत्रकारलाई आवश्यक सामग्री खरिद गर्नुपरेमा पनि उक्त कोषबाट सहयोग रकम उपलब्ध गराउन सकिने अध्यक्ष श्रेष्ठले जानकारी दिएका छन् ।
अहिले महासङ्घको नाममा बैंकमा भएको रु एक लाख ११ हजार १११ उक्त कोषमा जम्मा गरिने बताइएको छ । पत्रकारिता क्षेत्रलाई व्यावसायिक बनाउनका लागि उक्त कोषले महत्वपूर्ण भूमिका निर्वाह गर्ने भन्दै सहयोगका लागि आह्वानसमेत गर्ने निर्णय भएको अध्यक्ष श्रेष्ठको भनाइ छ ।
यस्तै जिल्ला शाखाको हालसम्म भवन तथा जग्गासमेत नभएकाले अध्यक्ष श्रेष्ठको अध्यक्षतामा सात सदस्यीय जग्गा व्यवस्थापन समिति गठन गर्ने निर्णय गरिएको सचिव दिलबहादुर राईले जानकारी दिएका छन् । यस्तै पत्रकार महासङ्घको निर्वाचनका बेला मात्रै पत्रकारको खोजी गर्ने र गैरपत्रकारसमेत सदस्य रहन सक्ने भएकाले विवरणसमेत अद्यावधिक गर्ने निर्णय गरिएको छ । पत्रकारितालाई व्यावसायिक बनाउँदै पत्रकारको क्षमता वृद्धिका लागि स्थानीय सरकारसहित अन्य दातृ निकायसँग समन्वय गरिने अध्यक्ष श्रेष्ठले बताएका छन् ।
