काठमाडौं–नोबेल शान्ति पुरस्कार विजेता मुहम्मद युनुसलाई बिहीबार बङ्गलादेशको अन्तरिम सरकारको नेतृत्व गर्ने जिम्मेवारी दिइएको छ। उहाँलाई मुख्य सल्लाहकारको रूपमा नियुक्त गरिएको छ, जुन पदलाई प्रधानमन्त्री बराबरको मानिन्छ।
युनुसको प्रमुख कार्य देशमा शान्ति पुनर्स्थापना गर्ने र हप्ताँैदेखि जारी हिंसापछि नयाँ निर्वाचनको तयारी गर्नु रहेको छ। विद्यार्थी नेतृत्वको विरोध प्रदर्शनले पूर्व प्रधानमन्त्री शेख हसिनाको १५ वर्षे शासनलाई चुनौती दिएको थियो। विद्यार्थीहरूले आरक्षण प्रणाली लगायतका विषयमा असन्तुष्टि जनाएका थिए।
एक भव्य समारोहमा युनुसलाई राष्ट्रपति मोहम्मद शाहबुद्दिनले सपथ गराएका थिए। यस समारोहमा विभिन्न क्षेत्रका प्रतिनिधिहरू सहभागी भएका थिए। युनुसको मन्त्रिपरिषद्मा मुख्यतया नागरिक समाजका सदस्य र विद्यार्थी आन्दोलनका नेताहरू समावेश छन्।
सरकारी सेवामा आरक्षण प्रणालीको विरोधमा सुरु भएको विद्यार्थी आन्दोलन हिंसात्मक बन्दै गएको थियो। तीन सयभन्दा बढीको मृत्यु भएपछि देशभर व्यापक विरोध प्रदर्शन भएको थियो। यसको परिणामस्वरूप शेख हसिनालाई पदबाट राजीनामा दिन बाध्य पारिएको थियो।
पेरिसबाट फर्केर आएलगत्तै युनुसले बङ्गलादेशको जटिल राजनीतिक परिस्थितिलाई सम्हाल्ने जिम्मेवारी लिएका छन्। उनले देशलाई एकताबद्ध बनाउने र शान्तिपूर्ण रूपमा अगाडि बढाउने प्रतिबद्धता जनाएका छन्।
युनुसको मन्त्रिपरिषद्मा स्टुडेन्ट्स अगेन्स्ट डिस्क्रिमिनेसन ग्रुपका शीर्ष नेताहरू नाहिद इस्लाम र आसिफ महमुद जस्ता विद्यार्थी आन्दोलनका नेताहरू पनि समावेश छन्। यसबाहेक पूर्वविदेश सचिव, पूर्व महान्यायाधिवक्ता, पर्यावरण वकिल र मानवाधिकार कार्यकर्ता जस्ता विभिन्न क्षेत्रका विज्ञहरू पनि यस मन्त्रिपरिषद्मा छन्।
