विर्तामाेड / झापाको हल्दीबारीस्थित जलथलबाट इलाका बन कार्यालय जलथलको गस्ती टोलीले तीन थान भरुवा बन्दुकसहित एक जनालाई पक्राउ गरेको छ ।
गस्तीमा रहेको बनको टोलीले हल्दीबारी गाउँपालिका –५ का गुप्तबहादुर फागोको साथबाट तीन थान भरुवा बन्दुक फेला पारेको प्रमुख दीपकसेन भण्डारीले जानकारी दिए ।
बन्यजन्तु चोरी सिकार गर्नका लागि चार जनाको सङ्ख्यामा चारकोसे जङ्गल पुगेका उनीहरू बन कार्यालयको गस्ती टोली देखेपछि भाग्ने प्रयास गरेका थिए । भाग्ने क्रममा एकजनालाई नियन्त्रणमा लिएको भण्डारीले जानकारी दिए ।
पक्राउ परेका फागोमाथि अनुसन्धान भइरहेको छ । फरार रहेका तीनजनाको पहिचान भइसकेको भण्डारीले बताए । उनीहरूको खोजतलास तीब्र पारिएको बताइएको छ ।
