जुम्ला / जुम्लाको तिला गाउँपालिका –३ कुडारी सार्की वाडामा गए राति आगलागी हुँदा चार बालबालिकाको मृत्यु भएको छ ।
आगलागीमा परी मानसिंह सार्कीका छोरी १४ वर्षीया तिर्सना सार्की, ११ वर्षीया अनु सार्की, छोरो एक वर्षीय दिपेश सार्की र भान्जी ३ वर्षीया दर्शना सार्कीको मृत्यु भएको हो ।
सार्कीको घरमा शुक्रबार राती ११ बजे अचानक आगलागी भएको थियो। सदरमुकाम खलंगादेखि नेपाली सेना, नेपाल प्रहरी र सशस्त्र प्रहरीको टोली घटनास्थलमा पुगेर आगो नियन्त्रणमा लिएको थियो ।
आगलागीले तीनतले घरको दुई तला पूर्ण रुपमा नष्ट भएको प्रहरीले जनाएको छ । आगलागि हुँदा मानसिंहको परिवार कामका लागि घर बाहिर निस्केका थिए। घरमा फर्कँदा आगो लागेर घर जलिरहेको देखेको प्रहरीले जनाएको छ ।
मृतक बालबालिकाको शव पोस्टमार्टमका लागि कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा राखिएको छ। घटनाबारे प्रहरीले अनुसन्धान गरिरहेको जिल्ला प्रहरी कार्यालय जुम्लाका डीएसपी नरेन्द्र चन्दले जानकारी दिए ।
