बिर्तामोड / झापा प्रहरीले बुद्धशान्ति गाउँपालिका –१ बाट अवैध ढंगबाट ढुवानी गरिरहेको अवस्थामा सखुवाको काठसहित ट्याक्टर नियन्त्रणमा लिएको छ ।
शुक्रबार राति ८ बजे बुद्धशान्ति १ होक्सेबाट मे १ त २७४७ नम्बरको ट्रयाक्टर र र सखुवाको गोलिया तथा चिरान काठ ४२.५६ क्यूफिट नियन्त्रणमा लिएको हो । त्रिपालले छोपेर बुधबारे बजारतर्फ ल्याउँदै गरेको अवस्थामा प्रहरीले उक्त काठ फेला पारेको जनाएको छ ।
इलाका प्रहरी कार्यालय बुधबारेबाट सादा पोशाकमा गएका प्रहरीलाई देखेर चालकले ट्रयाक्टर भगाउन खोजेका थिए । प्रहरीले ट्रयाक्टर नियन्त्रणमा लिई चाबी खोसेपछि स्पेयर चावीले ट्रयाक्टर भगाए पनि बाटो नभेटेपछि ट्रयाक्टर छोडेर चालक भागेको स्थानीयले बताएका छन् ।
चालक तत्काल फरार रहेकोले खोजी भइरहेको जिल्ला प्रहरी कार्यालय झापाले जनाएको छ । बरामद ट्याक्टर र काठ आवश्यक कारबाहीको लागि बन कार्यालय पठाइएको प्रहरीको भनाइ छ ।
