सुर्खेत / कालिकोटमा जिप दुर्घटना हुँदा एक जनाको मृत्यु भएको छ भने चार जना घाइते भएका छन् ।
मंगलबार बिहान रास्कोटबाट मान्मा जाँदै गरेको प१ल २३ नम्बरको जिप नरहरिनाथ गाउँपालिकाको लालिघाटमा दुर्घटना हुँदा एकजनाको घटनास्थलमै मृत्यु भएको कर्णाली प्रदेश प्रहरी कार्यालयका प्रवक्ता एसएसपी अर्जुन चन्दले जानकारी दिए ।
चन्दका अनुसार दुर्घटनामा परी सान्नी त्रिवेणी गाउँपालिका –३ की ३५ वर्षीया पम्फा फडेराको मृत्यु भएको हो । भएको दुर्घटनामा अन्य ४ जना घाइते भएको र उनीहरूको अवस्था सामान्य रहेको प्रहरीले जनाएको छ ।
प्रहरीका अनुसार गाडी भिरालो र चिप्लो बाटोका कारण सडक छेउमा पल्टिएको थियो । जिपमा १४ जना यात्रु सवार थिए ।
