वीरगञ्ज / जंगली हात्तीको आक्रमणबाट कलैया उपमहानगरपालिका २ औधापुर बस्ने ४५ वर्षीय रामदेव पटेलको मृत्यु भएको छ ।
पटेललाई बिहान आठ बजे खेतमा काम गरिरहेका बेला हात्तीले आक्रमण गरी गम्भीर घाइते बनाएको थियो ।
गम्भीर अवस्थामा रहेका उनलाई उपचारका लागि कलैया अस्पतालमा ल्याउँदै गर्दा बाटोमा मृत्यु भएको जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिएका छन् ।
पर्सा राष्ट्रिय निकुञ्जबाट हात्ती आएको हुनसक्ने प्रहरीले जनाएको छ । पसाहा खोलातिर पसेको हात्ती नियन्त्रणको लागि निकुञ्जबाट प्राविधिक टोली बोलाइएको प्रहरी नायब उपरीक्षक मिश्रले जानकारी दिएका छन्।
