सिन्धुलीगढी / राष्ट्रपति
विद्यादेवी भण्डारीले ऐतिहासिकस्थल सिन्धुलीगढी नेपाली शूरता र वीरताको परिचय भएको
बताएका छन् ।
नेपालकै पहिलो सिन्धुलीगढी युद्ध सङ्ग्रहालयको उद्घाटन
गर्दै भण्डारीले सङ्ग्रहालयलाई विश्वसामु चिनाउने काम नेपाली गौरवको विषय रहेको
बताएकी छन् । उनले यसलाई पर्यटकीयस्थलमा विकास गर्न सकिने र पर्यटन
प्रवद्र्धनमार्फत आर्थिक लाभ लिन सकिने बताएकी छन् ।
नागरिक र सैनिक सम्बन्धको उत्कृष्ट नमूनाका रुपमा
सङ्ग्रहालय रहेको जनाउँदै राष्ट्रपतिले अनुसन्धानकर्ता, विद्यार्थी एवं
स्वदेशी र विदेशी पर्यटकका लागि गन्तव्यस्थलका रुपमा विकास गर्न सकिने बताएकी छन् ।
एकीकरणका घटना र विषयलाई पाठ्यक्रममा समावेश गरी राष्ट्रिय एकता प्रवद्र्धन
गरिनुपर्नेमा राष्ट्रपतिको जोड थियो ।
सो अवसरमा कानून, न्याय तथा संसदीय
मामिलामन्त्री ज्ञानेन्द्रबहादुर कार्कीले नेपालको स्वतन्त्रता र स्वाधीनताको
रक्षामा महत्वपूर्णस्थलका रुपमा सिन्धुलीगढी रहेको बताएकी छन् । उनले
सिन्धुलीगढीमा युद्ध सङ्ग्रहालय स्थापना गौरवपूर्ण इतिहास जोगाउने महत्वपूर्ण
कार्य भएको बताउँदै यसले राष्ट्रिय एकता र सुरक्षामा सहयोग पुग्ने बताएकी छन् ।
सरकारले यस्ता सङ्ग्रहालय निर्माणलाई नीति तथा कार्यक्रम र बजेटमा प्राथमिकताका
साथ समावेश गर्ने उनले बताएकी छन् ।
सांसद गणेशकुमार पहाडीले ऐतिहासिकस्थल संरक्षणका लागि १००
पर्यटकीय गन्तव्यस्थलमा समावेश गरेर सिन्धुलीगढीलाई चिनाउने काम भएको बताउँदै यो
पर्यटकीयस्थलका रुपमा अङ्ग्रेजहरुको पनि गन्तव्यस्थल हुन सक्ने बताएका छन् ।
प्रधानसेनापति पूर्णचन्द्र थापाले ऐतिहासिकगढी, किल्ला र एकीकरण
मार्गको संरक्षणको कार्ययोजना बनाएर संरक्षणमा लागिएको बताएका छन् । उनले इतिहास
बिर्सने राष्ट्रको औचित्य नहुने भएकाले २५३ वर्षअघिको ऐतिहासिक स्थललाई चिनाउने
काम भएको बताएका छन् । कार्यक्रममा कमलामाई नगरपालिकाका प्रमुख खड्गबहादुर खत्री र
उपप्रमुख मञ्जु देवकोटाले पनि नव निर्मित युद्ध सङ्ग्रहालयलाई आकर्षक पर्यटकीय स्थलका
रुपमा विकास गरिने प्रतिबद्धता जनाएका छन् ।
सो अवसरमा प्रधानसेनापति थापाले नगर प्रमुख खत्रीलाई
सङ्ग्रहालय हस्तान्तरण गरेका छन् । विसं १८२४ असोजमा अङ्ग्रेजसँग भएको युद्धको
सम्झनामा सो सङ्ग्रहालय निर्माण गरिएका हो । सङ्ग्रहालयमा त्यतिबेलाको युद्धमा
प्रयोग भएका हातहतियार र ऐतिहासिक दस्तावेज सङ्ग्रह गरिएको छ । युद्धमा सहभागी
भएका झण्डै दुई हजार ४०० अङ्ग्रेज फौजमध्ये करिब एक हजार ६०० को मृत्यु भएको
बताइन्छ ।
