देवेन्द्र किशोर :आईपीएल २०२६ मा मुम्बई इण्डियन्सको उपाधि यात्रामा पूर्ण विराम लागेपछि मुख्य प्रशिक्षक माहेला जयवर्धनेले कठिन प्रश्नहरूको सामना गर्नुपरेको छ। आइतबार राति रोयल च्यालेञ्जर्स बेंगलुरुसँग अन्तिम बलमा रोमाञ्चक हार बेहोरेपछि पाँच पटकको च्याम्पियन टोली प्लेअफको दौडबाट बाहिरिएको हो।
हारपछि पत्रकार सम्मेलनमा जयवर्धनेले सम्पूर्ण सिजनलाई निराशाजनक भन्दै टोलीले अवसरहरूको सही सदुपयोग गर्न नसकेको स्वीकार गरे। उनका अनुसार, ब्याटिङ र बलिङ दुवैमा निरन्तरता नहुँदा नतिजा प्रभावित भयो।
“यो सिजन हामीका लागि निराशाजनक रह्यो। अवसरहरू भए पनि हामीले त्यसको फाइदा उठाउन सकेनौं,” जयवर्धनेले भने। उनले थपे कि प्लेअफमा पुग्न अन्तिम चरणमा २–३ जित आवश्यक थियो, तर टोली त्यो हासिल गर्न असफल रह्यो।
उनले अन्तिम खेललाई पनि सिजनको प्रतिनिधि उदाहरण भन्दै प्रदर्शन औसतभन्दा कमजोर रहेको बताए। “हामी हाम्रो उत्कृष्ट लयमा थिएनौं, र त्यो स्पष्ट देखियो,” उनले स्वीकार गरे।
टोलीले लगातार प्लेइङ–११ मा गरेको परिवर्तनबारे उठेका प्रश्नमा जयवर्धनेले स्पष्टिकरण दिँदै भने कि त्यो रणनीतिक होइन, बाध्यात्मक थियो। चोट र फिटनेस समस्याका कारण खेलाडीहरू उपलब्ध नहुँदा परिवर्तन गर्नुपरेको उनको भनाइ थियो।
“हामीले धेरै रणनीतिक परिवर्तन गरेका होइनौं। उपलब्धता समस्याका कारण मात्र टोलीमा फेरबदल भयो,” उनले भने।
सीनियर खेलाडीहरूको खराब फर्म हुँदाहुँदै पनि उनीहरूलाई लगातार मौका दिइनु रणनीतिक निर्णय हो कि भन्ने प्रश्नमा उनले खेलाडीहरूको क्षमता र प्रतिबद्धतामाथि विश्वास रहेको बताए। रोहित शर्माको उदाहरण दिँदै उनले चोटपछि उनी उत्कृष्ट लयमा फर्किएको उल्लेख गरे।
यस सिजन कप्तान हार्दिक पाण्ड्या ढाडको चोटका कारण धेरै खेल गुमाउन बाध्य हुँदा टोलीको सन्तुलन बिग्रिएको थियो। त्यस्तै, सूर्यकुमार यादवको कमजोर प्रदर्शन पनि चिन्ताको विषय बनेको छ। उनले ११ खेलमा केवल १९५ रन मात्र बनाउन सकेका छन्।
समग्रमा जयवर्धनेले टोलीको असफलता व्यक्तिगत कमजोरीभन्दा पनि सामूहिक प्रदर्शन र परिस्थितिजन्य चुनौतीहरूको परिणाम भएको बताएका छन्।
