हेटौँडा । हेटौँडा बजार क्षेत्रमा सडक विस्तारका लागि टास्कफोर्स फिल्डमा खटिएपछि २५ गजभित्र पर्ने व्यवसायीहरू पसल खाली गर्ने तयारीमा जुटेका छन् । यसै क्रममा व्यापारीहरूले सामान छिटो विक्री गर्न ‘सेल’ घोषणा गरेपछि बजारमा ग्राहकको भीड झनै बढेको छ ।
विशेषगरी फर्निचर, कपडा तथा घरेलु सामग्रीका पसलमा ग्राहकको चहलपहल उल्लेखनीय छ । आज बिहानैदेखि हेटौँडाको सिमाचोकदेखि नेपाल बैंक आसपासको क्षेत्र निकै व्यस्त बनेको स्थानीयहरूले बताएका छन् ।
व्यापारीहरूका अनुसार सडक विस्तारको तयारीसँगै उनीहरूको व्यवसायमा ठूलो असर परेको छ । संरचना भत्किने अवस्था भएपछि थुप्रै व्यवसायी बाध्यतावश सामान सस्तोमा बिक्री गर्न थालेका हुन्।
बजारमा बढेको भिडले तात्तिएको व्यापार भए पनि व्यवसायीहरू भने चिन्तित देखिन्छन् । उनीहरू भन्छन्, ‘सडक विस्तार विरोधी होइनौँ, तर पूर्वसूचना र उचित क्षतिपूर्ति नदिई घर–पसल भत्काउन खोजिँदा ठूलो क्षति भएको छ ।’
सडक विस्तारसम्बन्धी कार्य अगाडि बढेसँगै हेटौँडा बजार क्षेत्रमा यतिबेला बेचबिखन र चहलपहल दुवै असामान्य रूपमा बढेको देखिन्छ ।
