काठमाडौं— कोशी प्रदेश पर्यटन वर्ष २०८२ को सचिवालयले काठमाडौंमा पर्यटन व्यवसायीका छाता संघसंगठनसँग छलफल गरेको छ । पर्यटन वर्षको तयारी स्वरुप सचिवालयले अहिले प्रवर्द्धनात्मक कामलाई निरन्तरता दिनेक्रममा मंगलबार काठमाडौंका पर्यटन व्यवसायीसँग छलफल गरेको हो ।
काठमाडौंको भृकुटीमण्डपस्थित नेपाल पर्यटन बोर्डको हलमा आयोजित कार्यक्रममा कोशी पर्यटन वर्ष २०८२ का बारेमा जानकारी दिँदै पर्यटन, वन तथा वातावरण मन्त्रालयका सचिव विशाल घिमिरेले नेपालमा पर्यटनका क्षेत्रमा काम गर्ने सबै निकाय काठमाडौंमा रहेकाले समन्वय गर्न काठमाडौं आएको बताए । कोशी प्रदेशको पर्यटन कसरी मजबुद बनाउने, प्रदेशका कामलाई कसरी राष्ट्रियस्तरमा ल्याउने भन्ने विषय छलफलको एजेण्डा रहेको जानकारी गराएका थिए ।
कोशी प्रदेश पर्यटन वर्षको उद्घाटन आगामी चैत २७ गते लालीगुँरासको राजधानी भनेर चिनिने तीनजुरेबाट गरिने भन्दै सचिव घिमिरेले सबैलाई निम्तो गरे । प्रधानमन्त्री केपी शर्माको उपस्थितिमा हुने उद्घाटन कार्यक्रममा ढकमक्क फूलेको लालीगुराँसको सुन्दरदृश्यसहित कोशीको पर्यटनमा बहार ल्याउने गरी कार्यक्रम अघि बढाइने बताए । नेपालमा संघको पर्यटन प्रवर्द्धनभन्दा प्रदेशको पर्यटन ५० वर्ष नै पछि रहेको भन्दै प्रदेशमा पर्यटनको संस्थागत विकासका लागि आफूहरुले काम गरिरहेको जानकारी गराउँदै पर्यटन वर्षलाई कस्तो बनाउँदा समग्र पर्यटन क्षेत्रको विकास हुनसक्छ भन्दै छलफलका लागि फ्लोर खुला गराएका थिए ।
छलफलमा आफ्नो राय राख्दै होटल संघ नेपालका कोषाध्यक्ष युवराज श्रेष्ठले पर्यटन प्रवर्द्धन गर्ने गरी कोशी प्रदेशले ल्याएको कार्यक्रम पर्यटन व्यवसायीका लागि हौसलाको विषय भएको बताए । उनले आन्तरिक पर्यटनलाई जोड दिँदै अघि बढ्न सुझाए । श्रेष्ठले पर्यटकलाई होटल संघले सकेसम्म उच्चतम सेवा दिने गरी काम गर्ने प्रतिवद्धता जनाए ।
कार्यक्रममा नेपाल एसोसिएसन अफ टूर एण्ड ट्राभल एजेन्टस् नाटाका उपाध्यक्ष घनश्याम घिमिरेले पर्यटकलाई पर्यटकीय स्थलमा कसरी पुर्याउने भन्ने विषय महत्वपूर्ण रहने बताए । पूर्वाधारको विकास, यातायातको सहजतासँगै जनशक्ति व्यवस्थापनलाई ध्यान दिनुपर्ने सुझाव घिमिरेको छ । पर्यटकीय क्षेत्रको विकासका लागि आजै सबै काम गर्न नसकेपनि यसलाई योजनाबद्ध बनाएर लैजानुपर्ने उनले बताए ।
नेपाल पर्यटन बोर्डका पूर्व सदस्य तथा पर्यटन व्यवसायी नवाङ निमा शेर्पाले नयाँ पर्यटकीय गन्तव्यको खोजीमा जुट्न सुझाव दिए । उनले नीति निर्माण तहदेखि नै पर्यटन प्रवर्द्धनमा समस्या रहेको बताउँदै नीतिकै कारण काम गर्न नसक्ने अवस्था आउन नहुने बताए ।
प्याराग्लाइडिङमा क्षेत्रमा काम गरिरहेका भूपेन्द्र चाम्लिङ भूपालले कोशी प्रदेश प्याराग्लाइडिङको अथाह सम्भावना भएको क्षेत्र भएको बताउँदै नीतिगत व्यवस्थाले काम गर्न भने अफ्ठ्यारो भएको बताए । उनले सहज वातावरण भए नेपाली भूमिमा प्याराग्लाइडिङमात्र गर्न आउनेमध्ये वार्षिक ६/७ लाख पर्यटकलाई कोशीमा पुर्याउन सकिने बताए । उनले १५ दिनदेखि एक महिनाको प्याकेज लिएर आउने प्याराग्लाइडिङमा पर्यटकलाई राख्नसक्ने खालका प्याकेज बनाउन सुझाएका छन् ।
ट्रेकिङ एजेन्सिज् एसोसिएसन अफ नेपाल टानका महासचिव सोनाम ग्याल्जेन शेर्पाले प्रचार गर्ने शैली सुधार गर्दै सामाजिक सञ्जालको प्रयोग र गन्तव्यको प्रचारमा गुणस्तरीय सामग्री प्रस्तुत गर्न सुझाएका छन् ।
नेपाल पर्यटन बोर्डका पूर्वउपाध्यक्ष रहेका पर्यटन व्यवसायी चन्द्र रिजालले पर्यटनलाई बढाउन प्रवर्द्धनसँगै समन्वय र कनेन्टिभिजीलाई जोडदिन सुझाएका छन् । पर्यटन व्यवसायमा लगानी बढाउनुपर्ने बताउँदै सुरुमा लगानी गर्न सकेमात्र मानिसको उपस्थिति बढ्ने बताए । व्यवसायीलाई विस्वस्त पार्न पनि नयाँ गन्तव्यमा घुमाउने योजनासहितको कार्यक्रम ल्याउनुपर्ने रिजालको सुझाव छ ।
अर्का पर्यटन व्यवसायी दिपक महतले आफूहरुले नीतिगत सुधारका लागि धेरै आवाज उठाए पनि उचित कार्यान्वयन नभएको बताउँदै सरकारकै पहलमा प्रदेश भ्रमण वर्षको कार्यक्रम घोषणा गरिनु सुखद रहेको भन्दै सरकारले नीति निर्माणमा दूरगामी महत्वका विषय समेट्नुपर्ने बताए । उनले पर्यटकलाई लक्षित गरेर बनाइएका प्याकेज सस्तो हुनुपर्ने र सरकारी नीति असुली गर्नेमात्र खालको हुन नहुने सुझाएका छन् । कोशी प्रदेशले विश्वमा ताजका रुपमा रहेको सगरमाथालाई देखाएर गौण रहेका पर्यटकीय स्थललाई बेच्न सक्नुपर्ने बताएका छ्न ।
पर्यटन व्यवसायी सरिता लामाले पर्यटकीय गतिविधिलाई बढाउन सूचना र प्रविधिको प्रयोगलाई पनि जोड दिनुपर्ने बताइन् ।
कार्यक्रममा होटल व्यवसायी शंकर भण्डारीले कोशी प्रदेशले सुरु गरेको पर्यटकीय यो कदम उदाहरणीय रहेको बताए । उनले कोशी पर्यटकीय सम्भावना के भन्ने कुरा व्याख्याको विषय नै नभएको भन्दै अब पर्यटक बढाउन काम गर्नुपर्ने बताए । उनले कोशीका सबै जिल्लालाई समावेश गर्ने गरी कार्यक्रम ल्याउन सुझाएका छन् ।
सबै व्यवसायीका कुरा सुनेपछि नेपाल पर्यटन बोर्डका वरिष्ठ निर्देशक हिक्मत सिंह ऐरले पर्यटन बोर्डले पर्यटकीय गतिविधिको प्रवर्द्धनका काममा सहकार्य गर्दै अघि बढ्ने बताए । उनले आगामी आर्थिक वर्षको बजेटमा पनि कोशी प्राथमिकतामा परेको बताए । बोर्डले पर्यटनका क्षेत्रमा काम गर्नेसँग उर्जा बढाउँदै सहकार्य गर्ने उनको प्रतिवद्धबता छ ।
कोशी पर्यटन वर्ष २०८२ निर्देशक समितिका उप संयोजक भवेश श्रेष्ठले अन्तर प्रदेश समन्वय बढाउँदै काम गर्ने बताएका छन् ।
कार्यक्रमको अध्यक्षता गरेका कोशी पर्यटन वर्ष २०८२ निर्देशक उपसिमितका उपसंयोगक कृष्ण शाहले पर्यटन व्यवसायीका छाता संस्थासँग गरिएको छलफल महत्वपूर्ण भएको भन्दै यो छलफलले कोशी प्रदेशमा पर्यटकीय गतिविधिलाई थप चलायमान बनाउन मद्दत पुग्ने बताए । उनले अब पर्यटकीय गतिविधिमा कोशी प्रदेशले नेतृत्व गर्ने भन्दै वर्तमान सरकारले पर्यटन प्रवर्द्धन र पर्यटकीय विकासका लागि खेलेको योगदानको प्रसंशा गरेका छन् ।
कोशी प्रदेश भ्रमण वर्ष २०८२ का अवसरमा ३६५ दिन कै क्यालेन्डर बनाएर काम गर्ने तयारी गरेको छ । आगामी चैत २७ गते गुराँसको राजधानी मानिएको तीनजुरे क्षेत्रमा हुने भ्रमण वर्षको उद्घाटन कार्यक्रममा सहभागी हुन सबैलाई कार्यक्रममार्फत आमन्त्रण पनि गरिएको छ ।
