डीआईजी चन्दले महानिरीक्षक वसन्तबहादुर कुँवर सगको छलफल पछि फिर्ता लिए राजीनामा

काठमाडौं । गत शुक्रबार पदबाट राजीनामा दिएका त्रिभुवन अन्तर्राष्ट्रिय विमानस्थलका  प्रहरी नायव महानिरीक्षक (डीआईजी) अर्जुन चन्दले राजीनामा पत्र फिर्ता लिएका छन्।डीआईजी चन्दले प्रहरी प्रधान कार्यालयसँगको परामर्शमा राजीनामा फिर्ता लिएका हुन् । डीआईजी चन्दले  माघ १९ गते पदबाट राजीनामा दिएका थिए ।

उनले प्रहरी हेडक्वार्टरमा बुझाएको राजीनामा पत्र फिर्ता लिएर गएका हुन् । उनलाई केही दिन बिदामा बस्न प्रहरी प्रधान कार्यालयले सुझाएको स्रोतले बतायो । प्रहरी महानिरीक्षक (आईजीपी) वसन्तबहादुर कुँवर, मानवस्रोत विभागका प्रमुख एआईजी टेकप्रसाद राईलगायतले उनीसँग छलफल गरेर राजीनामा नदिन सुझाएको स्रोतले बतायो । डीआईजी चन्द कुँवरकै ब्याचमेट हुन्। त्रिभुवन अन्तर्राष्ट्रिय विमानस्थलको अध्यागमन कार्यालयका अधिकृतमाथि प्रहरीबाट भएको हातपात घटनामा आफ्नै मातहतका कर्मचारीहरुलाई बचाउन नसकेपछि डीआईजी चन्दले राजीनामा दिएका थिए।

विमानस्थलमा अध्यागमन कर्मचारी र प्रहरीबीच कुटपिट भएको घटनामा छानबिन गर्न गठित समितिले डीएसपी, असई र जवानलाई कारबाहीको सिफारसप्रति उनी रुष्ट थिए । तर, तीन दिन बित्न नपाउँदै डीआईजी चन्दले राजीनामा फिर्ता लिएका हुन् ।