काठमाडौं / काठमाडौंको बेसिगाउँमा बसले स्कुटरलाई ठक्कर दिँदा एक जनाको मृत्यु भएको छ, भने दुई जना घाइते भएका छन् । मृत्यु हुनेमा स्कुटरमा सवार ओखलढुङ्गा घर भएका १८ वर्षीय दिपेन दाहाल रहेका छन् । दाहालको बिहीबार पौने ४ बजे उपचारका क्रममा जोरपाटीस्थित नेपाल मेडिकल कलेजमा मृत्यु भएको बौद्ध प्रहरीले जनाएको छ ।
बसको ठक्करबाट स्कुटर चालक र स्कुटरमा पछाडि सवार अर्का एक जना घाइते भएका छन् । उनीहरूको नेपाल मेडिकल कलेज जोरपाटीमा उपचार भइरहेको साथै बस चालक र बसलाई नियन्त्रणमा लिएको प्रहरी वृत्त बौद्धले जनाएको छ । जोरपाटीबाट सुन्दरीजलतर्फ जाँदै गरेको बा ३ ख १३१८ नम्बरको बसले विपरीत दिशाबाट आउँदै गरेको बाग्मती प्रदेश ०२–०१२ प ५३२६ नम्बरको स्कुटरलाई बिहीबार मध्याह्नमा ठक्कर दिएको थियो ।
