धरान / सुनसरीको धरान उपमहानगरपालिका –४ स्थित धरान–भेडेटार सडक खण्डमा बस र टेम्पो एक आपसमा ठोक्किँदा एक जनाको मृत्यु भएको छ ।
मृत्यु हुनेमा सुनसरीको भरौला घर भई हाल धरान –१७ बस्ने टेम्पो चालक अन्दाजी ४० वर्षीय खड्ग विक रहेका छन् ।
धरानतर्फ आउँदै गरेको को २ ह ७०४१ नम्बरको टेम्पो र धरानबाट तेह्रथुम जाँदै गरेको को१ख ४४८० नम्बरको बस एकआपसमा ठोकिँदा चालक विकको घटनास्थलमै मृत्यु भएको इलाका प्रहरी कार्यालय धरानका प्रहरी नायब उपरीक्षक (डिएसपी) बुद्ध श्रेष्ठले जानकारी दिए ।
श्रेष्ठका अनुसार टेम्पोमा सवार ताप्लेजुङ घर भएकी १५ वर्षीया उषा लिम्बू गम्भीर घाइते भएकी छिन् । लिम्बूको धरानस्थित बीपी प्रतिष्ठानमा उपचार भइरहेको छ ।
बसका चालक धनकुटाको महालक्ष्मी नगरपालिका –२ घर भई हाल धरान –१७ बस्दै आएका ४५ वर्षीय गोविन्द कटुवाल इलाका प्रहरी कार्यालय धरानको नियन्त्रणमा रहेको प्रहरीले जनाएको छ ।
