काठमाडौं । देशको राजनीतिक माहोल परिवर्तनतर्फ उन्मुख भइरहेका बेला प्रधानमन्त्री वालेन्द्र (बालेन) शाह र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन बीच सिंहदरबारमा उच्चस्तरीय भेटवार्ता भएको छ।
प्रधानमन्त्री तथा मन्त्रिपरिषद्को कार्यालयमा बिहीबार भएको भेटमा पछिल्लो राजनीतिक घटनाक्रम, बदलिँदो सत्ता समीकरण, राष्ट्रिय सरोकारका विषय तथा आपसी चासोका विविध मुद्दामा छलफल भएको प्रधानमन्त्रीको सचिवालयले जनाएको छ।
भेटवार्तामा प्रधानमन्त्री बालेन र राप्रपा अध्यक्ष लिङ्देनसँगै राप्रपाका वरिष्ठ उपाध्यक्ष बुद्धिमान तामाङ तथा केन्द्रीय सदस्य एवं प्रतिनिधिसभा सदस्य खुस्बु ओली पनि सहभागी थिए।
यद्यपि बैठकमा कुनै औपचारिक निर्णय भएको वा सहमति बनेको विवरण सार्वजनिक गरिएको छैन। दुवै पक्षले मुलुकको वर्तमान राजनीतिक अवस्था, समसामयिक चुनौती र आगामी राजनीतिक दिशाबारे विचार आदान–प्रदान गरेको जनाइएको छ।
पछिल्ला दिनमा संघ र प्रदेश दुवै तहमा सत्ता समीकरणबारे विभिन्न अड्कलबाजी चलिरहेका बेला प्रधानमन्त्री र प्रमुख विपक्षी दलका नेताबीच भएको यो भेटलाई राजनीतिक वृत्तमा अर्थपूर्ण रूपमा हेरिएको छ। विशेषगरी बदलिँदो राजनीतिक परिस्थितिमा प्रमुख दलहरूबीच संवाद बढिरहेका बेला बालेन–लिङ्देन भेटले नयाँ राजनीतिक सन्देश दिन सक्ने चर्चा पनि सुरु भएको छ।
यद्यपि, भेटपछि कुनै पक्षले सरकार गठन, सत्ता सहकार्य वा अन्य राजनीतिक समझदारीबारे औपचारिक धारणा सार्वजनिक गरेको छैन। हाललाई यसलाई समसामयिक राजनीतिक अवस्था र राष्ट्रिय हितका विषयमा भएको नियमित उच्चस्तरीय संवादका रूपमा हेरिएको छ।
