काठमाण्डौ । संघीय संसदका दुवै सदनको बैठक आज बस्दैछ । प्रतिनिधि सभाको बैठक बिहान ११ बजे बस्ने कार्यसूची छ ।
आजको बैठकमा राज्य व्यवस्था तथा सुशासन समितिका सभापति रामहरि खतिवडाले ‘संघीय निजामती सेवा विधेयकसम्बन्धी समितिको प्रतिवेदन, २०८०’ पेस गर्ने कार्यसूची तय भएको छ । उपप्रधानमन्त्री एवम् अर्थमन्त्री विष्णुप्रसाद पौडेलले आव २०८१/८२ को आर्थिक सर्वेक्षण पेस गर्नेछ । भूमिसम्बन्धी केही नेपाल ऐनलाई संशोधन गर्ने विधेयक, २०८२ माथि दफावार छलफल गरी आजै पारित गरियोस् भन्ने प्रस्ताव पेस हुनेछ ।
प्रतिनिधि सभाको बैठकमा कृषि, सहकारी तथा प्राकृतिक स्रोत समितिका सभापति कुसुमदेवी थापाले ‘कृषि सहकारी तथा प्राकृतिक स्रोत समितिको वार्षिक प्रतिवेदन, २०८२’ पेस गर्नेछिन् । युवा तथा खेलकुद मन्त्रालय र स्वास्थ्य तथा जनसङ्ख्या मन्त्रालयसम्बन्धी मौखिक प्रश्नको सम्बन्धित मन्त्रीले उत्तर दिने सम्भावित कार्यसूची तय भएको संघीय संसद सचिवालयका महासचिव पद्यमप्रसाद पाण्डेयले जानकारी दिए ।
राष्ट्रिय सभाको बैठक अपराह्न १:१५ मा बस्दैछ । राष्ट्रिय सभामा पनि उपप्रधानमन्त्री एवम् अर्थमन्त्री विष्णुप्रसाद पौडेलले आव २०८१/८२ को आर्थिक सर्वेक्षण गर्ने सम्भावित कार्यसूची छ ।
कानुन, न्याय तथा संसदीय मामिलामन्त्री अजयकुमार चौरसियाले प्रतिनिधि सभाबाट सन्देशसहित प्राप्त ‘केही नेपाल ऐन संशोधन गर्ने विधेयक, २०८० लाई दफाबार छलफलका लागि विधायन व्यवस्थापन समितिमा पठाइयोस्’ भन्ने प्रस्ताव प्रस्तुत गनेछ । राष्ट्रिय सभाको बैठकमा आज शहरी विकास, भूमि व्यवस्था, सहकारी तथा गरिबी निवारण, स्वास्थ्य तथा जनसङ्ख्या र वन तथा वातावरण मन्त्रालयसँग सम्बन्धित मौखिक प्रश्नको सम्बन्धित मन्त्रीले उत्तर दिने कार्यसूची छ ।
सरकारले आजको बैठकमार्फत आगामी आर्थिक वर्ष २०८२/८३ का लागि प्रस्तावित आर्थिक सर्वेक्षण प्रस्तुत गर्ने तयारी गरेको छ। यो सर्वेक्षण हिजो नै प्रस्तुत गरिनुपर्ने कार्यसूचीमा थियो, तर विपक्षी दलको अवरोधका कारण सम्भव भएन।
प्रतिपक्षले स्वतन्त्र छानबिन आयोग गठनसहित गृहमन्त्रीको तत्काल राजीनामा माग गरिरहेका छन्। यस्तो अवस्थामा आजको बैठकमा राजनीतिक सहमति जुटाउने प्रयास हुने अनुमान गरिएको छ। अर्थमन्त्री विष्णुप्रसाद पौडेलद्वारा प्रस्तुत गरिने आर्थिक सर्वेक्षण बजेटको पूर्वभूमिका हुने भएकाले यो बैठक संसदको आगामी कार्यसूचीका लागि महत्वपूर्ण मानिएको छ।
