उदयपुर । विपद्को पूर्वानुमान गर्न नसक्दा उदयपुरको कटारी नगरपालिका-२ मा निर्माणाधीन पक्की पुल भत्किएको छ ।
तीन दिनअघिको वर्षाका कारण अमाहाखोलामा आएको बाढीले मिर्चैया-कटारी खण्डअन्तर्गत सिमानपुर र कल्याणपुर जोड्ने पुल ढलान गरिसकेको पुल भत्काएको हो ।
चैतमा यति ठूलो वर्षा भएर बाढीको अनुमान नगरिएकाले ठूलो भौतिक क्षति भएको निर्माणको जिम्मा लिएको सूर्या एण्ड सन प्रालिका प्रतिनिधि निमेष श्रेष्ठले बताए।
इलाका प्रहरी कार्यालय कटारीका प्रमुख उवं प्रहरी नायब उपरीक्षक कमल बजगाईँले प्रारम्भिक अनुमानमा रु. दुई करोडको क्षति भएको जानकारी दिए । वर्षापछि खहरे खोलाको बाढी थुनिएको जनाउँदै प्रनाउ बजगाईँले उक्त थुनिएको पानी बग्ने बेला पुल भत्काएको उल्लेख गरे।
पुल भत्किनुमा गुणस्तर हीन काम भएको हुनसक्ने स्थानीयको गुनासो आएपछि इञ्जिनियरसहित अनुगमनमा पुगेका कटारी नगरपालिकाका प्रमुख राजेशचन्द्र श्रेष्ठले खोला थुनिएकाले पानीको बहाव रोकिँदा बाढी आएर क्षति भएको पाइएको जानकारी दिए ।
बाढीले पुल भत्काएपछि हालसम्म बनेको संरचना भत्काएर अर्को निर्माण गर्नुपर्ने मिर्चैया-कटारी-घुर्मी सडक आयोजनाको कार्यालयका प्रमुख पशुपति ज्ञवालीले बताए । “यहाँ राखिएका तार २८ दिनपछि तन्काउनु पर्ने थियो, तर बाढीले १८ दिनमा क्षति पुर्याएको छ । अब सबै संरचना भत्काएर पुनः काम थाल्नुपर्छ”, उनले भने ।
पचास मिटर लम्बाइ र ११ मिटर चौडाइको पुलमुनि लगाइएको ह्युमपाइप थुनिएर जम्मा भएको पानीले टेका बगाउँदा निर्मित संरचना भाँचिएको थियो । निर्माण कम्पनीले दुई वर्षमा निर्माण सम्पन्न गर्ने गरी बि.सं. २०७९ असार २९ गते उक्त खण्डअन्तर्गत पर्ने चार वटा पुल रु. २८ करोड ९९ लाख ५२ हजारमा जिम्मा लिएको थियो । उक्त खण्डअन्तर्गत सिमानपुर, खोक्सा, गिद्धाबर र तारा घारीमा पुल बनाउने जिम्मा प्रालिले लिएको छ ।
