काठमाडौं— नेपाल प्रहरी श्रीमती संघ कोशी प्रदेशले सुनसरीको हरिनगर गाउँपालिका–५ स्थितका १२ घर अग्नि पिडित परिवारहरुलाई राहत वितरण गरेको छ ।
संघले सोमबार १२ घर अग्नि पिडित घर परिवारका सदस्यहरुलाई ओढ्ने ब्लाङ्केट, म्याट, त्रिपाल, चामल, दाललगायत खाद्यान्नका सामग्री वितरण गरेको हो ।
कोशी प्रदेश प्रहरी प्रमुख प्रहरी नायव महानिरीक्षक राजन अधिकारीको प्रमुख आतिथ्यता तथा नेपाल प्रहरी श्रीमती संघ कोशी प्रदेशकी अध्यक्ष श्रीमती सुस्मिता के.सी., जिल्ला प्रहरी कार्यालय सुनसरीका प्रमुख प्रहरी उपरीक्षक सुमन कुमार तिम्सिना तथा हरिनगर गाउँपालिका अध्यक्ष गफार अंसारीको विशेष आतिथ्यतामा राहत सामग्री वितरण गरिएको जनाएको छ।
राहत वितरणको क्रममा प्रदेश प्रहरी प्रमुख अधिकारीले विपदको समयमा पिडित परिवारलाई आईपरेका समस्यामा प्रहरीको साथ र सहयोगको लागी राहत लिएर उपस्थित भएको बताउँदै नागरिकमा आई पर्ने जुनसुकै विपत्तिमा प्रहरीको सदैव साथ र सहयोग रहने विश्वास व्यक्त गरे ।
आगलागी भएको स्थानमा प्रदेश प्रहरी प्रमुख अधिकारी, श्रीमती संघ कोशी प्रदेशकी अध्यक्ष के.सी. लगायतले स्थलगत अवलोकन गरेका थिए । आगलागी पीडित परिवारलाई राहत सामग्री वितरण गरेको भन्दै गाउँपालिकाका अध्यक्ष गफार अंसारीले नेपाल प्रहरी श्रीमति संघ कोशी प्रदेशप्रति आभार प्रकट गरेका थिए।
राहत वितरण कार्यक्रममा नेपाल प्रहरी श्रीमतीसंघ कोशी प्रदेशका पदाधिकारी तथा स्थानियबासीहरु लगायत प्रहरी कर्मचारीहरुको उपस्थिति रहेको थियो । चैत्र १८ गते भएको आगलागीबाट १२ घर तथा गोठहरु जलेर नष्ट भएको थियो ।
