काठमाडौं— नेपाल स्टक एक्सचेन्ज (नेप्से) को प्रमुख कार्यकारी अधिकृत (सीइओ) मा चुडामणि चापागाई नियुक्त भएका छन् ।
सोमबार बसेको मन्त्रिपरिषद्को बैठकले चापागाईलाई सीइओमा नियुक्त गर्ने निर्णय गरेको हो । झापाका चापागाईंले लामो समय सानिमा बैंक तथा सानिमा रिलायन्स लाइफ इन्स्योरेन्समा रहेर काम गरेका छन् ।
नेप्सेको सीइओ छनौटमा चुडामणि चापागाईंसहित नारदकुमार लुइँटेल, पूर्णप्रसाद आचार्य, बद्रिप्रसाद प्याकुरेल र हेमन्त बस्याल सर्टलिस्टमा परेका थिए । यसअघि नेप्सेको सीईओमा लुइँटेललाई नियुक्त गरिए पनि सो निर्णय मुख्यसचिवबाट प्रमाणित भएको थिएन ।
अर्थमन्त्रालय स्रोतका अनुसार चैत १२ गते बसेको मन्त्रिपरिषद् बैठकले नारदकुमार लुइँटेललाई नेप्सेको सीइओ बनाउने निर्णय गरेको थियो ।
पर्यटन व्यवसायी समेत रहेका लुइँटेललाई सिईओ नियुक्त गर्दा आलोचना हुन सक्ने भएपछि मन्त्रिपरिषदले पुनः अर्को नाम नियुक्त गरेको हो ।
