काठमाडौं— सांसद प्रेम आलेले नेपाल नागरिक उड्ड्यन प्राधिकरण (क्यान) का महानिर्देशक प्रदीप अधिकारी र नेपाल वायुसेवा निगमका अध्यक्ष युवराज अधिकारीलाई पार्टीको दबाबमा नियुक्त गरिएको बताएका छन् । दुई अधिकारीलाई नियुक्त गर्न नेकपा (एकीकृत समाजवादी)का सम्मानित नेता झलनाथ खनालले दबाब दिएको उनले जिकिर गरे ।
आफूले खनाल र पार्टीका अरू नेताको दबाबमा प्राधिकरण र निगमका कार्यकारी पदमा नियुक्त गरेको बताए । शुक्रबार प्रतिनिधिसभाअन्तर्गतको सार्वजनिक लेखा समितिको बैठकमा उनले १२औँ तहका पाँच वरिष्ठ अधिकारी रहँदा पनि उनीहरूलाई नै नियुक्त गर्नुपर्ने भन्दै आफूलाई पत्र पठाइएको सुनाए ।
“मैले आठ महिना २१ दिन मन्त्रालय चलाएँ । धेरै बाधा, अड्चन आए,” उनले भने, “पार्टीबाट चिठी आएको थियो, यो यो मान्छेलाई यहाँ नियुक्त गर, त्यसमा प्रदीप अधिकारीको पनि नाम थियो ।”
उनले अगाडि भने “अब के गर्ने, समाजवादी नयाँ पार्टी पनि भो, अलिकति चलायमान पनि बन्नुपर्यो, धेरै प्रेसरका बाबजुदमा नेपाल एयरलायन्सको चेयरम्यान झलनाथ खनालको सिफारिसमा र पार्टीका अन्य नेताको सिफारिसमा प्रदीप अधिकारी र युवराज अधिकारी भए ।”
