काठमाडौं । रसुवाको भोटेकोशीमा आएको विनाशकारी बाढीपछि त्रिशूली–३ ‘ए’ जलविद्युत् आयोजनाको सुरुङभित्र फसेका दुई जनालाई १० दिनपछि जीवितै उद्धार गरिएको छ। नेपाली सेना, सशस्त्र प्रहरीलगायतको संयुक्त टोलीले शुक्रबार बिहान लामो खोज तथा उद्धार अभियानपछि सञ्जय साह र कविर महर्जनलाई सकुशल बाहिर निकालेको हो।
बाढी आएको १० दिनसम्म सुरुङभित्र फसेका उनीहरूको अवस्था अज्ञात थियो। समय बित्दै जाँदा परिवार र आफन्तमा उनीहरू जीवितै भेटिने आशा कमजोर बन्दै गएको थियो। तर उद्धार टोलीले सुरुङभित्र खोजी जारी राख्दै अन्ततः दुवै जनालाई जीवितै बाहिर निकाल्न सफल भएको हो।
उद्धार गरिएका सञ्जय साह नेपाल विद्युत् प्राधिकरणका चौथो तहका कर्मचारी हुन्। त्रिशूली–३ ‘ए’ आयोजनामा मर्मतसम्बन्धी काम भइरहेको समयमा साह त्यहाँ पुगेको हुनसक्ने बताइएको छ। बाढी आएपछि उनी सुरुङभित्रै फसेका थिए। त्यस्तै, कविर महर्जन त्रिशूली–३ ‘ए’ जलविद्युत् आयोजनाका सुपरभाइजर हुन्। आयोजना प्रमुख आवास ओझाका अनुसार महर्जन आयोजनामै कार्यरत थिए। बाढीपछि सुरुङभित्र फसेका उनी पनि १० दिनसम्म उद्धारको प्रतीक्षामा रहेका थिए।
शुक्रबार बिहान सबैभन्दा पहिले सञ्जय साहको जीवितै उद्धार गरिएको थियो। उद्धारपछि नेपाली सेनाको टोलीले उनको स्वास्थ्य परीक्षण गर्दा अवस्था सामान्य रहेको पाइएको छ। लामो समय सुरुङभित्र बसेर पनि साहको स्वास्थ्य अवस्था सामान्य देखिनु उद्धार टोलीका लागि राहतको विषय बनेको छ। साहसँगै कविर महर्जनलाई पनि जीवितै उद्धार गरिएको हो। उनको स्वास्थ्य परीक्षण तथा थप उपचारका लागि हेलिकप्टरमार्फत काठमाडौंस्थित छाउनी अस्पताल ल्याइएको नेपाली सेनाका प्रवक्ता तथा सहायक रथी राजाराम बस्नेतले जानकारी दिएका छन्।
भोटेकोशी बाढीपछि सुरुङभित्र मानिस फसेको आशंकामा नेपाली सेना, सशस्त्र प्रहरीसहितका सुरक्षा निकायको टोलीले लगातार खोजी गरिरहेको थियो। सुरुङभित्रको कठिन अवस्था, बाढीले ल्याएको माटो तथा भग्नावशेष र जोखिमपूर्ण भू–बनोटका कारण उद्धार कार्य निकै चुनौतीपूर्ण बनेको थियो।
तर १० दिनसम्मको निरन्तर प्रयासपछि दुई जनालाई जीवितै निकालिएसँगै लामो समयदेखि निराश बनेका परिवारमा खुसी फर्किएको छ। बाढीमा ठूलो मानवीय क्षति भइरहेका बेला सुरुङभित्रबाट दुई जनाको जीवित उद्धार हुनु विपद्को पीडाबीच आशाको दुर्लभ खबर बनेको छ। सञ्जय र कविरको उद्धारले सुरुङभित्र फसेका अन्य व्यक्तिको खोजीमा समेत नयाँ आशा जगाएको छ। उद्धार टोलीले अब सुरुङका बाँकी सम्भावित स्थानमा खोजीलाई थप तीव्र बनाउने तयारी गरेको छ।
