जुम्ला / जुम्लामा यस वर्ष पहिलो पटक हिमपात भएको छ । जुम्लामा करिब आधा फिट जति हिउँ जमेको र हिउँ परिरहेको स्थानीयले बताएका छन् । हिउँ परेपछि चिसो भने बढिरहेको छ ।
चिसोबाट जोगिन तथा न्यानो गर्न स्थानीय प्रशासनले जुम्ला सदरमुकामका विभिन्न चोक चोकमा आगो बालेको छ ।
प्रमुख जिल्ला अधिकारी विजया कुमारी प्रसाईँका अनुसार हिमपातले अहिलेसम्म कतै असर नपुर्याएको र जिल्ला वन कार्यालय, चन्दननाथ नगरपालिकाको समन्वयमा दाउरा व्यवस्थापन गरिएको हो ।
सशस्त्र प्रहरी ३३ नम्बरका गणपति गगन श्रेष्ठका अनुसार जुम्ला सदरमुकाममा आधा फिट र अग्लो स्थानमा एक फिट हिउँ जमेको छ । उनका अनुसार हिमपात भएपछि पत्रकार महासङ्घ अगाडि, बसपार्क, कृष्ण मन्दिर, जिल्ला प्रशासन , कोलखोली, विमानस्थल लगायतका स्थानमा दाउरा वितरण गरी आगो बालेर न्यानो गर्ने काम भएको छ ।
हिउँले हिउँदे वालीलाई फाइदा पु¥याउने किसानहरू बताउँछन् । स्थानीय किसान सुलोचना हितानका अनुसार हिउँले पानीको समेत काम गर्ने भएकाले राम्रो हुने भएको बताए ।
हिमपातले नागरिकको जनजीवन भने प्रभावित भएको छ । लगातार हिमपातका कारण चिसो बढेपछि मानिसहरू, पशुचौपाया सबै घरभित्र बस्न बाध्य भएका छन् ।
जुम्लाको तापक्रम न्यूनतम माइनस ०.६ र अधिकतम ७.० रहेको जल तथा मौसमविज्ञान कार्यालय जुम्लाका कर्मचारी जमुना हमालले जानकारी दिए ।
