झापा / रौतहटको कटहरिया नगरक्षेत्रभित्र लामो समयदेखि फरार एकजना हत्याका आरोपीलाई गाउँलेले पक्राउ गरेर प्रहरीलाई बुझाएका छन् ।
कटहरिया १ भसेढवाका सन्दीप यादवको हत्याको आरोपमा फरार रहेका सोही वडा खोर टोलका ४० वर्षीय लक्ष्मी दास तत्मालाई गएराति गाउँलेले पक्राउ गरि प्रहरीलाई बुझाएका हुन् ।
सन्दीप यादवको हत्या गरेर फरार भएको आरोप लागेका दास आइतबार राति लुकिछिपी घरमा आउने विशेष सूचनाको आधारमा गाउँलेहरू खोरटोलको छेउमा कुरेर बसेका थिए ।
गएराति ८ बजे मुख छोपेर मोटरसाइकलमा आएका हत्याका आरोपी दासलाई गाउँलेहरूले मोटरसाइकलसहित पक्राउ गरी सशस्त्र बेस क्याम्प पोखरभिण्डामा बुझाएका थिए । त्यसपछि लगत्तै सशस्त्र प्रहरीले उनलाई नेपाल प्रहरीलाई बुझाएको छ ।
प्रहरी चौकी हरिनगर पोखरभिण्डाका प्रमुख असई सञ्जय यादवले घटनाको पुष्टि गर्दै पक्राउ परेका हत्याका आरोपी दासलाई राति नै इलाका प्रहरी कार्यलय विजयपुर पठाइएको जानकारी दिएका छन ।
